Psa 16 | PMA | STEP | Ahi Asuv, kikur koe nau, namundesinuk konamaentei tounah tisa nasut nau.

Psalms 16

Ahi vi Vatte ten Moulien ka Kur Koe Ir

1 Ahi Asuv, kikur koe nau,
namundesinuk konamaentei tounah tisa nasut nau.
2 Naviteni minuk keke, “Keik kovi Asuv onak.
Tounah vasi tetahos onak ka venuk.”

3 Meatin keil onen Ahi avi votut ka amoreite mok,
ekvati mok nito hetal min keil.
4 Ka koakeil amusil ahi sav keil
aleh mahien mai en keil.
Navong keil iha netan min ahi one, nirkapiltei hetal keil;
ka nirlah ruai tei hetal min keil navong akur sanien keil one.

5 Ahi Asuv, kosa moulien onak mules en hem;
en avong keil koa hemai, namundesinuk kisan tounah natamureini.
6 Ahi, keik kotahos komulin atan vou tounah sav keil ten out netan koa nakur kati.
Inau ikur kat keik enges.
7 Ahi Asuv, namasmasuk ven korie minau asa numoni.
Ka, en vongien emun, sise koa mal maluv enau.
8 Ahi Asuv, lises nalinguk mulamun enau;
ven koan koro vesesal, tounah tovuol vasak kululnau.

9 Sakini, nasinau mok, tinok vilelau en sien,
ka metauen tovuol enau,
10 veni kokur koe nau ran keihoen ten matien.
Lises namum vasi umen koa kosani minau,
sakini, konaseseintei nau nihas en out ten matien.

11 Kitie minau sise koa ten moulien.
Nalonge tahos imok ven koro ral minau;
vesesal venuk, sien mul lises.